65 iseggasen aya deg-wasmi i d ilul yetri n tlelli: Lwennas MATUB

Publié par

Ass n 24 yennayer 1956, Taqbaylit turew-d yiwen yetri. D itri n tlelli. D itri  ur nxessi: yess i nettaf abrid n yiseγ, n tjaddit d yimal n liser d telwit. 
Lwennas Matub Ilul-ed d tafat yessuzufen tillas, yedder d asirem yettarran iḍ d ass; γef tlelli d tnekkit, yeγli d ameγras. 
Isem-is inuda-d meṛṛa timura. Yuγal d ayla n talsa. Yid-es, yewwi isem Aqbayli d yisem Amaziγ, s teqbaylit yessa-ten di yal tiγmert n umaḍal. 
Yecna akeffir-nneγ, yessefra aγiflif-nneγ, yessemγer deg-yiseγ-nneγ, yefka afud i umennuγ-nneγ, icebbeḥ tajaddit-nneγ.

Am-wakken yessider tinekkit-nneγ ara yidir deg-wul n teqbaylit ur t ntettu ara. Ad d-yeqqim d yiwet ger tqucac n umezruy aqbayli d umaziγ. 
Lwennas yedder d ilelli, yugi lqid n udabu amesbaṭli. Aḍar-is inuda akal aqbayli , yezreΣ deg-s asirem n tlelli : win i k-yennan sanda tleḥḥuḍ, in’as : nekk d amaziγ. 
Zik i d-ibeggen taqbaylit: kker a taqbaylit sbedd lqed-im ziɣ mači d targit iban-ed yisem-im
Yemla-yaγ-d amek ara nili di liser : win i k-yennan d acu i d-tafat, in-as: d iγallen yedduklen. 
Asirem i t-izedγen, yugar tizzeγzeγt n icinga n tudert:Xas neqḍen acḥal d itri, igenni-nneγ ur inegger ara. 
Yenjeṛ abrid n tegrawla i tsutwin ara d-yalin: Ddwa-s ad ncerreg tamurt. 
Ur yeǧǧi yiwet, yenna-tent-id meṛṛa. Yal tazlitt d-tamsirt. Yal asurif yedda, yelḥa-t γef tutlayt-is. Yedder i weγref-is. Yefka tudert-is d asfel akken ad d-yefsu ujeǧǧig n tlelli. 


Ass n 25 yunyu 1998, cleqfen-t wid ineqqen asirem. Ar tura,  ur d tban ara tillawt  γef tmenγiwt-is . Anda ulac tidet d teγdemt ulac talwit. Wid Yenγan Lwennas, ad d-banen ass-a neγ azekka. Ur zmiren ara ad rewlen sdat n umezruy. Annect tebγu tekk-it, ayen zerΣen ad -t-megren. 
Ulac ttkal γef udabu azzayri ur ntekkes γef tidet taduli acku seg-es ar ɣur-es. Ulamek ara neccekti i win i γ-yewwten. Asmi ara ncerreg tamurt, d aγref aqbayli ara icaxen γef yiman-is, imir-en, tidet anda tella ad-d-tban: ma di tmurt ad d-tekfel, ma deg-yigenni ad d-teγli. 
Aggad i t-yenγan, ur wwiḍen ara iswi-nnsen. Lwennas yekka-d nnig tatut, ur as tezmir ara lmut. Yessew adrar s idammen-is, xas tafekka-s ddaw tmedlin, ssut-is ad yebbaεzeq i lebda. 
Imi ur yemmut ur yettmettat, ass-a n 24 yennayer, ad as nini s yiwet n taγect : Amulli ameggaz a Lwennas


Buεziz u Cebbi

Votre commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Photo Google

Vous commentez à l’aide de votre compte Google. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s