Publié par A yiqbayliyen acetki ulaḥed azrem yewweḍ d talafsa, ass-agi wid yesɛuzgen i wayen iḍerrun sɣur tasnareft tazayrit, wid yugin ad smeḥsen i ttɛebga refden ilmeẓyen yecban Sifaks, wid i s-yeqqaren deg uzagur-is i ṭṭeṛdiqen-t tyitwin mači deg zagur-is, ad izeṛ kan yiwet n temsalt yellan d ttbut : imi tessusmeḍ ass-a, ad ssusmen ɣef temsalt-ik azekka, imi tessusmeḍ ass-a xas heggi-d aɛrur-ik i wzekka.
iḍelli 28 deg yennayer akken akk tezṛam, d ass deg ara ɛeddin azal n 40 n yelmezyen imeɣnasen gar-asen aṭas n imeɣnasen n timunent, n teqbaylit d tugdut, zzat teɣdemt tazzayrit deg wexxam n creɛ n Bgayet, ihi imeɣnasen n teqbaylit am Syphax d win yefkan ttiɛad ad mlilen zzat wexxam n creɛ agi d ibeddi ar yidis n watmaten-nsen, am yal tikelt.
Syphax, d yiwen n umeɣnas ilemzi n teqbaylit yebdan timmuɣnest deg wasmi yella d llufan, taddert n tqerbuzt deg d-yefruri tetwassen ɣef uselqem n teqbaylit d tirrugza, ihi timmuɣnest-ines mači kan dayen i s-yellan i netta deg ul, maca d tamuɣli i fernen akk at wexxam-nsen, ɣef waya deg tsebḥit n yiḍelli 28 deg yennayer tedda yid-es yemma-s akked weltma-s, maca mači ahat d ayen nwan-t i yufant, imi send kan awwaḍ-nsen zzat wexxam n creɛ, yeɣli-d igenni fell-asen, imessulta izayrien zeḍmen fella-sen, zwaren deg Syphax, ɣlin deg-s s teɣrit ar lqaɛa ma d yemma-s d weltma-s refden-ten ar lkumisareyya.
Ad d-walim tanagit n Syphax deg tvideyyut agi yellan deg tagara n weḍris agi, i d-yessekles deg sebtar n tmeɣnast Mira Meknac, anda i d-yuɣal s ttfasil ɣer wayen i s-d-yeḍran yenna: » akken i yerwan s teɣrit nek, lhemm-iw amezwaru d anadi ɣef yemma akked weltma, ur zriɣ ara akken ḍelqen-asent-id, ǧǧan-i-yi ḥdaqreɣ s teɣzi n wass », yettban ɣef wudem n iceṭṭiḍden n Syphax leɛtab yesɛedda sɣur d tidett iɣallen n timhersa tazayrit deg tmurt taqbaylit.
Ar melmi a leqbayel ara neǧ adabu yagi ad yesɛedday lbaṭel ɣef wayetma-nneɣ d imawlan-nneɣ send ad nenṭeq s yiwet n taɣect ad sen-ini » YETTRAḤ YIMI-NWEN A YIƔERSIWEN N TEẒGI », ma nessusem ad ɣ-teḍru akken s-yenna da Sliman Azem : » Ma nettɛemmid i lbaṭel ad nuɣal akk am ṭṭbel, yal wa ad d-i-heggi aɛrur-is »
ameghnas.com 