Yassine Aissiouane : ifeḍḥ-ed asmeɛceq n ukabar n RCD akked rrebrab isenslem

Deg walɣu i d-iga mas Yasin ISIWAN deg sebtar-ines n Facebook, ur ilaq ara ad iɛeddi kan d taqeṭṭiṭ deg bisaṛ, imi yettammal-ed abaxix deg yekcem ass-agi ukabar « Aqbayli » RCD ( Agraw i yedles d tugdut), deg smeɛceq-ines akked irebraben isenselmen n « RACHAD », tasebba n walɣu agi tusa-d d tiririt anda i d-yerra ɣef usuter n uselway n ukabar agi mas Muḥsin Belɛebbas akken ad ixelleṣ mas ISIWAN tabzert i wkabar.

Ayen i-jebden lwelha n yeqbayliyen mači d timsal n daxel n ukabar agi ger mas ISIWAN akked mas BELƐEBBAS, maca d ayen i d-efeḥ, d tidett yefren i d-ibanen ar wannar aserti, ayen ladɣa i d-is-ḍehren tikli tamaynutt n RCD afus deg fus akked yeɛdawen n tmurt taqbaylit, mgal taneggarut agi, ayen ara d-yessegzin tuzya s uzagur n ukabar neqqaṛ « aqbayli » i tifrat n tmurt taqbaylit deg wegni asertan n wass-a.

Akk iqbayliyen, faqen send ladɣa tanekra n « tegrawla n wecmumeḥ » i d-yebdan ass n 16 Fuṛar 2019, d wamek i tedda d wanda i d-iban ad tessiweḍ, belli ulac tifrat i taluft nettidir ass-agi ama d lezzayer ama d tamurt taqbaylit, ma ur tezdi ara iɣallen-ines tmurt taqbaylit deg yiwen uwanek ara yesbedden abeddel mači kan i lezzayer maca i yakk tamnaṭ n tefriqt n ugafa.

 » Ur yettwaqenneɛ ara send imi yefka s wudem n ufus i yrebraben isenselmen n RACHAD, ama d ZIṭuṭ neɣ d Dhina, maca ara yessutur deg-i s wudem n teɣdemt ad ttekkiɣ s tedrimt deg segrireb d lexdiɛ-ines » d wagi i d awal n mas Isiwan ɣef uselway-ines aqbur mas Muḥsin Belɛebbas.

Deg tvideyyutt ara twalim deg tagara n weḍris agi akked mas Racid At Ali Uqasi n « TQ5″, Yasin Isiwan, yemmeslay-ed ɣef temlilit tuffirt ger Muḥsin Belɛebbas d Karim Ṭabu akked d iɛeggalen n RACHAD, ladɣa Ziṭuṭ akked Dehhina, deg wexxam n tilizri  » EL MAƔARIBEYYA », ar Yasin timlilit agi tuffirt, d tin i d-yellan akken RCD d Karim Ṭabu ad zzenzen i yrebraben isenselmen tamurt taqbaylit.

Mazal ad nezzi ar temsalt agi, imi d aṭṭan muqqren i d-yeɣlin ɣef tmurt taqbaylit, ad nefḍeḥ kra n usertan neɣ n weqbayli yenwan ad imud tamurt taqbaylit d tuṭict i yeɛdawen n tmurt, ihi imesḥaf agi, ma mači d iqbayliyen ara sen-yesɛetben tikli lezzayer ad sent-mud azuɣer s uttekki d uḥerkel n kra n warraw-is.