Publié par 13 Fuṛar 2010/ 13 Fuṛar 2021, 11 n iseggasen i yezrin ɣef tmettant n ucennay ameqqran RAHIM, ḥemlen aṭas n yeqbayliyen d teqbayliyin, isem-is n tidett Rahim Mohammed, mmi-s n At Ɛisa Mimun taddert n Imkecren, netta yesɛa kan 46 n iseggasen deg tudert-is, i ṛuḥ meẓẓi acukan ayen d-yeǧǧa muqqer.
Raḥim ilul-ed deg 7 Duǧember 1963 deg At Ɛisa Mimun, agezdu n Tizi-wezzu, deg temẓi-s yella yakan d win tekcem tayri n uẓawan aqbayli, asmi yella d anelmad deg uɣerbaz alemmas n CNET deg yeɣrem n Tizi-Wezzu, d win yettɣennin yakan i yemdukal-is d iselmaden-is. Deg 1974, Raḥim yesɛa Ddabex n uḍar ma d xal-is yesɛa snitra, yeṭṭafar-it armi mbaddalen, deg wasmi yesɛa snitra netta ɣef yiwet n tikti kan, ad yelmed aẓawan u ad yuɣal d acennay.
1979, Raḥim yekcem ar Tesnawit « Amirouche » n yeɣrem n Tizi-Wezzu, anda ara d-ibeggen s wudem unṣib ayen ira ad tyeg deg weḥric-a n uẓawan, deg seggas-nni ladɣa ara yexdem tizlitt-ines tamenzut tin umi yeqqar » taɛkemt » . Yessekles aḍebsi-s amenzu deg seggas n 1982 deg yeɣrem n « Iɛezzugen » acukan ur yelhi ara usekles-ines ɣef waya ur d-teffiɣ ara ar ssuq.
Deg 13 yennayer 1984, Raḥim yekcem akal afransi, akken yewweḍ ar yeɣrem n Paris d acennay muqqren-nniḍn i yufa ar yidisan-is, ibedd ɣur-es wagi d « FAHEM » win yesɛa imiren ttberna deg tmanaɣt, yeqqim yečča yeswa yerna lxedma, azal n krad n waguren, u yerna d Fahem s timmad-is i yewwin Raḥim ad yessekles deg wagur n Yebrir aḍebsi-nsen amenzu deg tezrigin Azwaw deg Barbès.
Aḍebsi amenzu n Raḥim d win i s-d-yewwin tamusni, yuɣal yeffɣ-ed yisem-ines ar tafat, yerna kra n iseggasen yessekles deg 1986 aḍebsi wis sin deg tezrigin AKFADOU MUSIC, anda yerna diɣ wis krad deg seggas n 1990, aneggaru-ya d win yelḥan ayen din, d armi omar Akfadou d win umi d-usa tikti n usekles n usaru deg llant 8 tezlatin, s tugniwin d taɣect .
Deg seggas n 1995, i yessekles Raḥim tizlitt-ines yetwasnen aṭas » Yya ad am-iniɣɣ », tizlitt iga d tajmilt i tmeṭṭut-is tamenzut » Fatiḥa » tizlitt anda i d-yettmeslay ɣef tayri ur nḍerru, deg tmeti yeččuren d tiyersiwin, Kra n wakud kan yemlal « Ḥamida » tin yuɣalen d yemm-as n warraw-is, yesɛa yid-es aqcic umi i semma « MASSY » d teqcict umi semman « TAFAT ».
Ulac win yumnen assmi yemmut Raḥim acku meẓẓi (46 n iseggasen) u yerna ur yehlik ara, d ul-is i ḥebsen deg 13 Furar 2010, yenṭel deg Tqerrabt n MDUḤA deg yeɣrem n Tizi-Wezzu, akka i yṛuḥ win yezzuznen tasut-as s tezlatin n tayri d tgemmi, werǧin ad tyettu wegdud aqbayli, imi ar ass-a n wussan mazal sellen-as deg tmurt taqbaylit.
ameghnas.com 