Amuli wis sin n tikli n Xeṛṛaṭa: Taqbaylit gar « Zéro Kabyle » d  » Zéro Vote ».

Publié par
Tawlift n Samir MAOUCHE

Ass-a d asmekti wis sin n tikli n Xeṛṛaṭa deg tama n bgayet, d igiman i d yeggagin yakan iḍelli tamedit, semman-as TIKLI TAƔELNAWT TAZAYRIT, maca deg tmurt taqbaylit. Ulac fell-as, ticki Tamurt Taqbaylit d tin ara i refden imenɣan ɣef tlelli d tugdut d talakt, deg akk tafriqt n ugafa, d wagi i d udem agrawliw n tmurt-nneɣ, akka i mucaɛet ger leǧnas, maca lɛib ticki arraw-is, ad tt-mudden d tamellat n leɛcur i wayen ur tt-yerzan ara. D tucmitt fell-aɣ, ma nettruḥu d iseflan ɣef wayen ur ɣ-yeɛnan, d tucmitt ma nedda d iqeffafen i lmend n tenṭelt-nneɣ, d lɛib muqrren ma neǧǧa tamurt taqbaylit ad tṛuḥ am tqeṭṭiṭ deg Bisaṛ.

LEQBAYEL BRAVO ƐLIKUM WELǦAZAYER TEFTAXER BIKUM !

Merkit a lxuja yecḍeḥ, aqbayli yellan yerzen, ass-a qnet-as wallen, ttawin-t kan deg mezzuɣ ? acḥal n temsirin i d-nerfed deg wass-nni deg yebda « Wembiwel » deg 16 Fuṛar 2019, Sin iseggasen-aya ; deg yal tikelt ara d-yessawel webrid ar kra n tigawt, iqbayliyen ttafen-d iman-nsen d iwḥiden. Mektit-ed asiwel ar unegzum ɣef lxedma, ɣer d-ssawlen imsedduyen n  » Wembiwel azayri ».

Akk lezzayer teldi, ḥala tamurt Taqbaylit i ykarfen, ayen ? Tennam-d d asihar amenzu, nekkni nennum, nutni d ibujaden. Kra kan n waguren , Gayed Saleḥ yessufɣ-ed acciwen-is, ladɣa metwal tamurt taqbaylit, yekref yakk, wid i refden anay amaziɣ, tennam-d ad ttwalim amek ara d-effɣen izayriyen s wanay amaziɣ, akken ad d-begnen ibeddi-nsen ar yeqbayliyen …nuṛǧa ad nwali izayriyen-a s wanay amaziɣ deg fus, 20 yebrir 2019 ulac, deg Yennayer 2020 ulac deg 20 yebrir 2020 diɣ ulac, xas nbeddu nettak-id, kunwi teqqarem kemmel-et iḍes, ma tukim-d ad yebḍu wenbiwel, tɛemdem ad yenger laṣel wala tazayrit-nwen.

Yewwḍ-ed usihar n 12/12, tennam-d akk izayriyen ad ɣunzun tifranin tiselwayin, tagara lezzayer akk tevvuṭi, xas ulamma drus yid-sen, ala deg tmurt taqbaylit i d-yeffeɣ ugummuḍ d ilem, nxelsit s iɛecraten umi d-kksen imsulta allen-nsen. Tessusmem ula deg plaṭuten n tilizriwin deg d-ttɛeddayem, ticki imdukal-nwen kkaten-d deg yeqbayliyen yugin ad ilin-t tefranin «  Izem d aqbayli i t-yenɣan, cciɛa d azayri i ttyersan« . Kra n waguren, nufa-d tikelt-nniḍen ala nekkni i ɣunzan tamendawt s ugemmuḍ ilem, anda nniḍen ṛuḥen ad vuṭin mgal tamaziɣt, acku izayriyen zṛan acu bɣan, ma d iqbayliyen ẓran kan acu ur bɣin ara .

Tadukli-nsen d asawen, tamusni-nsen d aɣilif !

Deg 20 Ɣuct, yella-d temlilit deg « MUSTAGANAM » gar-imesɛeṛbuben am Benkoula d Oussama waḥid d wiyiḍ, ayagi s tɛessast n ijadermiyen d ifettyanen n Gayed Saleḥ, timlilit umi semman « 0 KABYLE ». Nettṛaǧu lɣiḍ n izayriyen, ɣef temsalt am tagi, tennam-d « Tadukli taɣelnawt tazayrit », deg tidett ala tikkerhi taɣelnawt tazayrit i n-wala : LFEṚCIṬA, CERDAMA, ZEWWAF, BADISEYYA-NUVAMBREYYA, DECRA, HEZB FRANSA, LYED DDAXILEYYA, LIHUD, INFISALEYYIN, artg …

Tennam-d, ilaq ad neddu-t kan deg yiwen yeswi  » Ad nelḥu, ad nelḥu alamma yeɣli udabu », balak ad jebd-em tinekkit, tutlayt neɣ tasnektit ( idéologie) imi tugadem ad tebḍu tdukli werǧin nelli, akken i wen-nenna amek isenselmen ara ssexdamen tasnektit, ara k-eqqaren: D ttaɛrabt ara ttnebnu, s tisneslemt ara ttneẓẓu ! tennam-d, drus yid-sen, ala RACHAD i yhedren ! maca akken nfaq, ziɣ deg fransa temlalem, testenyam akk yid-sen, teqqarem: Ah wah, tjehlem, d « EL MUṬAṬAƔƔIFIN i tuɣalem.

Ihi, gull-eɣ anda ttɣaren izerman, ma tefkam-aɣ d iseflan, ad trebḥem s imeṭṭawen !

Azekka, yebna s temsirin n yiḍelli !

Sin iseggasen aya deg mi yebda « Wembiwel-Ḥirak », mači d yiwet n temsirt i yerfed wegdud aqbayli, xas ulamma yeḍmeɛ s tdukli-ines akked izayriyen ara yessiweḍ ad yeɣḍel  » Adabu Azayri » imi, weḥdes yeɛṛeḍ yakan maca ur yessaweḍ ara, yeɛṛeḍ deg seggas n 1963, deg seggas n 1977, deg 1980, deg 1981, deg 1998, taneggarut deg 2001.

Deg yal tikelt yettaf-ed iman-is, yesseɣleb fell-as udabu azayri, armi tyezdeɣ ccek, yenwa tlaq-as tallelt n izayriyen, ma ira ad iqecceɛ adabu azayri. Xas d tidett wayagi, maca ilaq agdud aqbayli, ad iseggem iman-is s yisem-is d agdud, ma yeḥseb iman-is d agdud, ihi yezmer ad yexdem tayett akked wegdud i s-yehwan.

Asihar i d-iteddun, neɣ i t-yettṛaǧun, d aseggem n wembiwel-ines, d tegrawla-as deg tmurt taqbaylit. Ilaq agdud aqbayli ad yeɛqel iman-is, d agdud, ad yebges i leṣlaḥ-is d lfayda-s, amahat deg tallit-a ara yettwaressi lsas i lebni n uwanek aqbayli, d tdamsa d wesnegmi ara yesǧuǧgen tamurt taqbaylit d warraw-is, acku ma tkemmel kan akka, ad naf iman-nneɣ, am yenzi-nni yeqqaren  » Aɣyul n baba d jeddi, ad rnu-ɣ rrekba deffir ».

Votre commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Photo Google

Vous commentez à l’aide de votre compte Google. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s